Ḓivhazwakale yo itwa musi mufumakadzi a tshi aniswa sa Thovhele Mutele
Vho hwala khuwelelo ya vhurangaphanḓa u bva kha u bebwa nahone vho khethwa nga vhomakhulukuku u itela u vhulunga mvelele na u bvela phanḓa nau ranga phanḓa vhathu vhavho.
“Hezwi a si zwa ḓivhazwakale fhedzi, zwi dovha zwa sumbedzisa u ḓiswa ha tshanduko.
“Zwi swaya mathomo a ndima ntswa hune vhupapa ha ṋea nḓila ya mvelele dzi bvelaho phanḓa,
“Hune vhuṱali ha sa tsha elwa nga mbeu, na hune vhurangaphanḓa ha sialala ha bvelela hu si na u xelelwa nga muya waho,” ho amba Ramathuba.
Vhutambo ha u aniswa ho vhona Thovhele Mutele a tshi vha mufumakadzi wa u thoma u gonya kha khuluṋoni ya sialala ya vhathu vha Mutele, nga murahu ha lushaka lune lwa katela Thovhele Ndwammbi Mutele, Thovhele Jack Tshitangoni na Khosi Vho John Khorommbi.
Vho Ramathuba vho ṱalusa murangaphanḓa muswa sa muthu o faneleaho nga nḓila yo khetheaho kha mushumo. Thovhele Mutele, nwana wa musidzana wa muṱahavu Khosi Mutele Khorommbi John na Nndafhiseni Emmah,
vho fhedza matiriki tshikoloni tsha ntha tsha Thengwe musi vha tshi wana digirii ya u thonifha kha mushumo wa matshilisano na saikholodzhi u bva Yunivesithi ya Venda.
“Ndi murangaphanḓa ane a pfesesa nndwa dza vhathu, hu si u bva kule, fhedzi u bva fhethu hune ha pfela vhuṱungu na ndivho.
“U ṱangana uhu ha pfunzo, mvelele na vhumuya zwi mu vhea vhukati ha murafho muswa wa vharangaphanḓa vha mvelele vhane vha vha vho ḓilugisela hu si u vhulunga vhufa fhedzi fhedzi na u sedzana na khaedu dza musalauno nga tshivhindi tsha vhuṱali,” ho amba mulangavundu.
Vho Ramathuba vho ṱuṱuwedza vharangaphanḓa vhaswa vha mvelele uri vha tevhele pfunzo, vha ri malofha a vhuhosi e eṱhe o vha a sa tsha eḓana kha tshifhinga tsha musalauno.
- Vhalani hafhu: Dyondza musoli ndi muhali wa lushaka lwa Vhatsonga
Vho Makhadzi Emmah Mudalahothe vho tanganedza u aniswa na u fulufhedziswa thikhedzo yavho kha murangaphanda muswa muhulwane wa sialala.
